02.01.2013 နေ့ဖတ်ရန်သတင်းများ

 

 

ကမ္ဘာ့ခေါင်းဆောင်တွေ နှစ်သစ်ကူး သဝဏ်လွှာပါး

 

 

 နယူးယောက်၊ Times Square မှာ ကျင်းပတဲ့ နှစ်သစ်ကူးမြင်ကွင်။ (ဇန်နဝါရီ ၁၊ ၂၀၁၃။)

• ကမ္ဘာတလွှား ၂၀၁၃ ခုနှစ် နှစ်သစ်ကို ကြိုဆိုကြတဲ့ နိုင်ငံတွေထဲ အမေရိကန်နိုင်ငံ ဟာ နောက်ဆုံးနိုင်ငံတွေထဲက တခုဖြစ်တာနဲ့အညီ နယူးယောက်မြို့က Times Square မှာ နှစ်သစ် ကြိုဆိုတဲ့ အခမ်းအနားကို ခမ်းနား ကြီးကျယ်စွာ ကျင်းပခဲ့ပါတယ်။
  ဒီ နှစ်သစ်ကူးပွဲတော်ကို လူပေါင်း ၁ သန်းကျော် တက်ရောက်ခဲ့ကြပြီး Times Square အလယ်ခေါင်မှာ ချိတ်ထားတဲ့ ဖန်ဘောလုံးကြီး တဖြည်းဖြည်း ကျလာတဲ့အချိန် ၂၀၁၂ ကို နှုတ်ဆက်ပြီး ၂၀၁၃ ခုနှစ်ကို ကြိုဆိုတဲ့အနေနဲ့ နံပတ်စဉ်ကို ပြိုင်တူ အော်ရေကြတာမှာ အမှတ်စဉ် သုံညကို ရောက်တာနဲ့ ၂၀၁၃ ဆိုတဲ့ စာတန်းကြီး ပေါ်ထွက်လာတာပါ။

ဥရောပ၊ အရှေ့အလယ်ပိုင်း၊ အာရှတိုက်နဲ့ ကမ္ဘာ့နိုင်ငံအသီးသီးက နှစ်သစ်ကူးပွဲတော်တွေကို ပုံစံအသီးသီးနဲ့ ကျင်းပခဲ့ကြတာပါ။ အေသင်၊ မော်စကိုနဲ့ လန်ဒန်စတဲ့ ကမ္ဘာ့အထင်ကရ မြို့ကြီးတွေမှာလည်း မီးရှုး မီးပန်းတွေ ပစ်လွှတ်ပြီး နှစ်သစ်ကူးပွဲတော်တွေကို ဆင်နွဲခဲ့ကြပါတယ်။ ဒူဘိုင်းနိုင်ငံမှာတော့ ကမ္ဘာ့အမြင့်ဆုံး အဆောက်အဦးကြီးပေါ်မှာ မီးရောင်စုံတွေထွန်းပြီး နှစ်သစ်ကို ကြိုဆိုခဲ့ပါတယ်။

၂၀၁၃ နှစ်သစ်ကူး ၀တ်ပြုဆုတောင်းပွဲမှာ ပုတ်ရဟန်းမင်းကြီး Benedict က ကမ္ဘာ့တ၀ှမ်း ငြိမ်းချမ်းရေးဖော်ဆောင်ဘို့နှင့် ချမ်းသာသူတွေနဲ့ ဆင်းရဲသားတွေကြား မညီမျှမှုကို ပြစ်တင် ရှုတ်ချလိုက်ပါတယ်။ Catholic ဘာသာဝင်တွေရဲ့ ကမ္ဘာ့ငြိမ်းချမ်းရေးနေ့ အထိမ်းအမှတ်အဖြစ် အင်္ဂါနေ့က St. Peters ဘုရားရှိခိုးကျောင်းတော်မှာ မိန့်ကြားခဲ့တဲ့ အမှာစကားမှာ ပုတ်ရဟန်းမင်းကြီးက ငွေကြေး အထိန်းအကွပ်မဲ့တဲ့ အရင်းရှင်စံနစ်ကို ဝေဖန်သွားပါတယ်။

ရုရှားသမ္မတ Vladimir Putin အပါအ၀င် တခြား ကမ္ဘာ့ခေါင်းဆောင်တွေကလည်း နှစ်သစ်ကူး သ၀ဏ်လွှာတွေ မိန့်ကြားခဲ့ကြပါတယ်။ မစ္စတာ ပူတင်က ၂၀၁၃ ခု အကဲစမ်းမှုတွေကို ယုံကြည်မှုအပြည့်နဲ့ သူ့နိုင်ငံသားတွေနဲ့အတူ လက်တွဲ ရင်ဆိုကြဖို့ တိုက်တွန်းခဲ့ပါတယ်။မြောက်ကိုရီးယားခေါင်းဆောင် Kim Jone Un ကလည်း မမျှော်လင့်ပဲ နိုင်ငံကို ပြောကြားတဲ့ အသံလွှင့် မိန့်ခွန်းမှာ ၂၀၁၃ ခုနှစ်မှာ သူ့နိုင်ငံနဲ့ တောင်ကိုရီးယားအကြား ထိပ်တိုက် ရင်ဆိုင်မှုတွေကို ဖယ်ရှားနိုင်ရေးက အရေးကြီးတဲ့ကိစ္စရပ်ဖြစ်ကြောင်း ပြောပါတယ်။ ဒါ့အပြင် နိုင်ငံအနေနဲ့ လွှတ်လပ်ရေး၊ ငြိမ်းချမ်းရေးနှင့် ချစ်ကြည်ရေး စံထားချက်တွေကိုလည်း စွဲကိုင်ထားဘို့နဲ့ စီးပွားရေး ဖွံ့ဖြိုး တိုးတက်ပြီး ခေတ်မီလက်နက်တွေ တည်ထွက် ထုတ်လုပ်နိုင်ဖို့ နိုင်ငံကို တိုက်တွန်း ပြောကြားခဲ့ပါတယ်။

ကင်ညာသမ္မတ Mwai Kibaki ကတော့ တင်းမာမှုတွေ ကြိုဖြစ်နေတဲ့ ၂၀၁၃ ခုနှစ် မတ်လမှာ ပြုလုပ်မယ့် အထွေထွေရွေးကောက်ပွဲတွေကို ငြိမ်းချမ်းစွာ ကျင်းပနိုင်ဖို့ တိုက်တွန်းလိုက်ပါတယ်။

ဗင်နီဇွဲလားမှာတော့ ပြီးခဲ့တဲ့လက ခွဲစိပ် ကုသမှုအပြီး ကျန်းမာရေးအခြေအနေ သိပ်မကောင်းကြောင်း သတင်းတွေ ထွက်ပေါ်မှုကြောင့် သမ္မတ Hugo Chavez အတွက် နိုင်ငံသားတွေက ၀တ်ပြု ဆုတောင်းပွဲတွေ ကျင်းပခဲ့ကြပါတယ်။ မစ္စတာ Chavez ဟာ ကင်ဆာရောဂါအပြင် အသက်ရှူလမ်းကြောင်းရောဂါပါ ခံစားနေရတယ်လို့ သိရပါတယ်။

လူချမ်းသာတွေကို အခွန် ၇၅ % ကောက်ဖို့ ပြင်သစ်သမ္မတ ကြိုးစား

အစိုးရက အခွန်တိုးကောက်ရင် သူတို့ တိုင်းပြည်အပြင် ထွက်နေမယ်လို့ဆိုသူ မင်းသား Gerard Depardieu

တရားရုံးက အခြေခံဥပဒေနဲ့ မညီပါဘူးလို့ ဆုံးဖြတ်တဲ့ကြားက ပြင်သစ်သမ္မတ ဖရန်ဆွာအော်လန်းက တိုင်းပြည်ရဲ့ လူချမ်းသာတွေကို အခွန် ၇၅ ရာခိုင်နှုန်း ကောက်ခံဖို့ ထပ်ကြိုးစားမယ်လို့ ပြောပါတယ်။

ခရစ်နှစ်ကူး တိုင်းပြည်ကို ပြောတဲ့ မိန့်ခွန်းမှာ တရားရုံး ဆုံးဖြတ်ချက်ကို ပြောင်းပြန်ဖြစ်အောင် လုပ်မယ်လို့ ထည့်သွင်းပြောပါတယ်။

တကယ်တော့ တရားရုံးက အခွန်တိုးကောက်မယ့် ကိစ္စကို သုံးသပ် ဆုံးဖြတ်ခဲ့တာ မဟုတ်ဘဲ၊ ဥပဒေကြမ်း လုပ်ထုံးလုပ်နည်းဆိုင်ရာ ကိစ္စတွေကိုသာ ထောက်ထား ဆုံးဖြတ်ခဲ့တာ ဖြစ်ပါတယ်။

ထိပ်သီးစီးပွားရေး လုပ်ငန်းရှင်ကြီးတွေကတော့ အစိုးရဟာ လူချမ်းသာတွေ တိုင်းပြည်က ထွက်သွားအောင် လုပ်တာပဲလို့ ပြောပါတယ်။

ရုပ်ရှင်မင်းသား Gerard Depardieu အပါအဝင် နာမည်ကျော် တချို့ကတော့ သူတို့ တခြားနိုင်ငံ သွားနေကြမယ်လို့ ဆိုပါတယ်။

၂၀၁၃ အတွက် ကြိုတင် ဟောကိန်းများ

၂၀၁၃ နှစ်သစ်ကို ရောက်လာခဲ့ပြီ ဖြစ်ပါတယ်။

ဒီ ၂၀၁၃ နှစ်သစ်မှာ မြန်မာ နိုင်ငံရဲ့ အနာဂတ် နဲ့ ပတ်သက်လို့ ပတ်သက်လို့ နက္ခတ် ဗေဒင် ပညာရှင် တွေက ဘယ်လို သုံးသပ် ကြပါသလဲ။

၂၀၁၃ အတွင်း ကြုံတွေ့ လာရမယ့် မြန်မာ့ နိုင်ငံရေး၊ စီးပွားရေး၊ လူမှုရေးရာ အဖုံဖုံနဲ့ ပတ်သက်လို့ ဆရာ စံဇာဏီဘို ကတော့ နိုင်ငံရေးမှာ ကြီးမားတဲ့ အပြောင်းအလဲတွေ နိုင်ငံတွင်းမှာ မပေါ်ပေါက် လင့်ကစား နိုင်ငံတကာ ဆက်သွယ်မှုနဲ့ ပတ်သက်တဲ့ လမ်းကြောင်း တွေမှာ ပိုမို ပွင့်လင်း အားကောင်းလာမှာ ဖြစ်တယ်လို့ ဆိုပါတယ်။

နိုင်ငံရေး

ဇန်နဝါရီ ၅ ရက်က နေ ၂၆ ရက် အတွင်း၊ တခါ မေလ ၂၁ ရက်ကနေ ဇွန်လ ၂၀ ရက် အတွင်းနဲ့ စက်တင်ဘာလ ၂၀ ရက်ကနေ အောက်တိုဘာလ ၂၀ ရက် အတွင်း တွေမှာ အုပ်ချုပ်မှု ပိုင်းဆိုင်ရာမှာ ဝန်ကြီးအဆင့်လောက်မှာ အပြောင်းအလဲ တွေ ရှိနိုင်တယ်လို့ ပြောပါတယ်။ အခြေခံအားဖြင့် အင်္ဂါနံနဲ့ ပတ်သက်တဲ့ ဌာနတွေမှာ ဖြစ်နိုင်ပြီး မူဝါဒပိုင်း အပြောင်းအလဲ တချို့လည်း တွေ့ရနိုင်ကြောင်း ပြောပါတယ်။

တခါ ဇန်နဝါရီ ၂၀ ရက်ကစပြီး ၄၅ ရက်တာ ကာလအတွင်း၊ ဧပြီ ၂၀ က မေ ၂၀ ကြားနဲ့ ဇူလိုင် ၂၀ ကနေ ဩဂုတ် ၂၀ ကြား ကာလ ၃ ခုမှာတော့ ထူးထူးခြားခြား ကောင်းခြင်းနဲ့ တိုးတက်ခြင်းတွေပါ တွဲဖက် ဖြစ်ထွန်းမှာ တွေ့ရတယ်လို့ ဆိုပါတယ်။

စီးပွားရေး

စီးပွားရေး အနေနဲ့ ကတော့ ကောင်းမယ်လို့ မမျှော်လင့်ကြောင်း၊ တူရာသီမှာ ရာဟုဂြိုဟ် တည်ရှိချိန်မှာ လမင်းက ၁၀ ဒီဂရီ တိမ်းစောင်း နေလို့ လမင်းက ရောဟဏီ နက္ခတ်ကို လှည်းဦး လမင်း ဖောက်ခြင်း ဆိုတဲ့ သဘာဝ ဖြစ်လို့ ကုန်သည်တို့ စီးပွားရေး အားနည်းလို့ ပြည်တွင်း လုပ်ငန်းရှင်တွေ လုပ်ရေး ကိုင်ရေး သိပ်အဆင်မပြေ နိုင်ကြောင်းနဲ့ ပြည်ပက ရင်းနှီးမြှုပ်နှံ သူတွေတော့ အကျိုးအမြတ် ရှိကောင်း ရှိနိုင်တဲ့ အကြောင်း တွေကို ပြောပါတယ်။

ပြည်တွင်း ငြိမ်းချမ်းရေး

ပြည်တွင်း ငြိမ်းချမ်းရေးနဲ့ ပတ်သက်လို့တော့ မမြင်သေးကြောင်း၊ ရောဟဏီကို တနင်္လာနဲ့ ထိနေလို့ အုပ်ချုပ်သူ မင်းကို ရဲမက် ဗိုလ်ပါက မလေးမခန့် ပြုတတ်တဲ့ အကြောင်း၊ အဲဒါကြောင့် အမိန့်သက်ရောက်မှု အားနည်း နိုင်ကြောင်း ပြောပါတယ်။ နိုင်ငံရေး ခေါင်းဆောင်တွေက ငြိမ်းချမ်းရေး လိုလားပေမယ့် စစ်ဘက်ဆိုင်ရာ တွေက အမိန့်အပေါ်မှာ အလေးအနက် ထားချင်မှ ထားမှာ ဖြစ်ပြီး လက်နက်ကိုင် တွေဘက်ကလည်း ပြည်ထောင်စု အစိုးရရဲ့ ဂတိ စကားတွေကို ယုံကြည်မှု ရှိချင်မှ ရှိနိုင်မှာ ဖြစ်ကြောင်း၊ ပဋိပက္ခ အသွင် ဆောင်နေဆဲ ဖြစ်ကြောင်းနဲ့ တိုက်ပွဲ အရှိန်အဝါတွေ ရှိနေဦးမှာ ဖြစ်ကြောင်း၊ ၂၀၁၄ ဇူလိုင် ၁၂ ရက် နောက်ပိုင်းမှာတော့ ကောင်းတဲ့ ဘက်ကို ရောက်လာစရာ ရှိကြောင်းတွေကို ပြောပါတယ်။

ဒေါ်အောင်ဆန်းစုကြည်

ဒေါ်အောင်ဆန်းစုကြည်နဲ့ ပတ်သက်လို့တော့ ကောင်းနေကြောင်း၊ ရွေးကောက်ပွဲ မတိုင်ခင် ၂၀၁၄ လောက်မှာဆို အင်မတန် လင်းလက် တောက်ပ နေတဲ့ အကြောင်း နဲ့ မြန်မာ နိုင်ငံမှာလည်း အမျိုးသမီး အုပ်ချုပ်မှု ယန္တရား ဘက်မှာ ရှိနေတာကို တွေ့ရကြောင်း၊ ဒါကို ပညာရှင် တော်တော်များများလည်း သတိထား မိတဲ့ အကြောင်း ပြောပါတယ်။

၇ ရက်သားသမီး

၇ ရက်သားသမီး တွေထဲမှာတော့ အင်္ဂါ၊ သောကြာနဲ့ ဗုဒ္ဓဟူး သားသမီးတွေ အားနည်းနေဆဲ ဖြစ်ပြီး ကျန်နေ့တွေက ပုံမှန်၊ စနေကတော့ အားအကောင်းဆုံး ဖြစ်တယ်လို့ ဆိုပါတယ်။

သဘာဝဘေးအန္တရာယ်

ဆက်လက်ပြီး ၂၀၁၃ ထဲမှာ သဘာဝ ဘေးတွေလည်း ရှိတဲ့ အကြောင်း၊ လမင်းက ၁၀ ဒီဂရီ စောင်းနေလို့ ဒီရေ အတက်အကျ သတိထား ရမှာ ဖြစ်ကြောင်းနဲ့ မေလနဲ့ စက်တင်ဘာ လတွေ အတွင်း လေနဲ့ ပတ်သက်တဲ့ သဘာဝ အန္တရာယ်၊ ရေနဲ့ ပတ်သက်တဲ့ သဘာဝ အန္တရာယ်၊ နောက်ပြီး မြေနဲ့ ပတ်သက်လို့တော့ မြေကြီး တုန်လှုပ်တဲ့ ငလျင်လို သဘာဝ အန္တရာယ် တွေနဲ့ ပတ်သက်လို့ အထူးပြု သတိရှိရမှာ ဖြစ်တယ်လို့ ဟောပြော ထားပါတယ်။

သတင်းစာထုတ်နိုင်ဖို့ လမ်းပြမြေပုံစာအုပ်ထုတ်

သတင်းစာတစောင် ဘယ်လို ထုတ်ဝေနိုင်တယ်ဆိုတဲ့ စည်းကမ်း၊ နည်းလမ်း ရေးထားတဲ့ စာအုပ်ရောင်း

သတင်းစာတစောင် ထုတ်လုပ်ပုံတွေ ပါပါဝင်တဲ့ စာနယ်ဇင်းကျင့်ဝတ်နဲ့ သတင်းစာ အခြေခံလုပ်ဆောင်မှု စာအုပ်ကို အစိုးရက ဖွဲ့စည်းပေးထားတဲ့ အများပြည်သူ ဝန်ဆောင်မှု သတင်းစာ အုပ်ချုပ်ရေးအဖွဲ့က ခုရက်ပိုင်း အတွင်းမှာပဲ တရားဝင် ထုတ်ပြန် ရောင်းချနေပါတယ်။

သတင်းစာတွေဟာ ပြည်ထောင်စု ပြိုကွဲစေမယ့် ကိစ္စတွေ၊ အချုပ်အခြာ အာဏာကို ထိပါးစေမယ့် သတင်းနဲ့ ဓာတ်ပုံတွေ မဖော်ပြရဘူးဆိုတဲ့ ပြီးခဲ့တဲ့ စစ်အစိုးရ လက်ထက်က အကြိမ်ကြိမ် ကျော့ပြောခဲ့တဲ့ စည်းကမ်းတွေ ပါသလို၊ တရားရုံးရောက်လို့ သတင်းရင်းမြစ်ကို တရားသူကြီးက မေးလို့ မဖြေခဲ့ရင် တရားရုံး မထီမဲ့မြင်ပြုမှုနဲ့ အရေးယူခံရမယ် ဆိုတဲ့ အငြင်းပွားဖွယ်ရာ အချက်တွေလည်း ပါနေတာကို တွေ့ရပါတယ်။

ပြန်ကြားရေးဒုတိယဝန်ကြီး ဦးရဲထွဋ်ကတော့ သူတို့ဟာ သတင်းစာတစောင်ကို ဘယ်လို စနစ်တကျ ထုတ်ဝေရသလဲ ဆိုတာကိုသာ အခြေခံ သဘော ပြောထားတာဖြစ်ပြီး၊ တကယ့် အဆုံးအဖြတ်တွေကတော့ သက်ဆိုင်ရာ သတင်းစာ အယ်ဒီတာတွေရဲ့ တာဝန်ပဲ ဖြစ်တယ်လို့ ပြောပါတယ်။

ဒီစည်းကမ်းတွေထဲမှာ သတင်းစာတွေမှာ ဥပဒေအကြံပေးတွေ ထားကြဖို့၊ သတင်းစာ လုပ်ငန်းတွေ ဆောင်ရွက်တဲ့ အခါမှာလည်း ဥပဒေအကြံဉာဏ်တွေ ယူကြဖို့ကို အကြိမ်ကြိမ် သတိပေး ပြောထားတာ ဖြစ်ပါတယ်။

အစိုးရက ပြီးခဲ့တဲ့ ရက်ပိုင်းကပဲ ဧပြီ ၁ ရက်ကစလို့ ပုဂ္ဂလိက သတင်းစာတွေ ထုတ်ဝေခွင့် ပေးမယ်လို့ ပြောခဲ့ပါတယ်။

အခွန်နဲ့ဘတ်ဂျတ်ကိစ္စ သမ္မတအိုဘားမားတိုက်တွန်း

လွှတ်တော်နှစ်ရပ်စလုံးက သဘောညီလိုက်ကြဖို့ အမေရိကန်သမ္မတက တိုက်တွန်းနေပါတယ်။

အမေရိကန်သမ္မတအိုဘားမားက အမေရိကန်အထက်လွှတ်တော်က အတည်ပြုပြီးဖြစ်တဲ့ အခွန်တိုးကောက်မယ့်ကိစ္စနဲ့ ဘတ်ဂျတ်ဖြတ်တောက်မယ့် သဘောတူညီထားချက်ကို အောက်လွှတ်တော်ကလည်း နှောင့်နှေးမနေဘဲ အတည်ပြုလိုက်ကြဖို့ကို တိုက်တွန်းလိုက်ပါတယ်။

လွှတ်တော်နှစ်ရပ်စလုံးက အတည်ပြုလိုက်မယ်ဆိုရင်တော့ အမေရိကန် လူလတ်တန်းစားတွေအပေါ် အခွန်တိုးကောက်နိုင်ချေနဲ့ ဒီကနေ့ကစလို့ သက်ရောက်တော့မယ့် ဘတ်ဂျတ် ဖြတ်တောက်လျှော့ချရမယ့် ကိစ္စတွေကို ရှောင်လွှဲလိုက်နိုင်မှာလည်း ဖြစ်ပါတယ်။

အခုအတည်ပြုမယ့် ကိစ္စမှာ တိုင်းပြည်ရဲ့ သူဌေးသူကြွယ်တွေဟာ မျှတတဲ့ အခွန်ကိုသာ ပေးကြရတာပါလို့ သမ္မတအိုဘားမားက ပြောပေမယ့် အောက်လွှတ်တော်မှာ အမတ်နေရာ အများစုရထားတဲ့ ရီပတ်ဘလေကန်တွေကတော့ ဒီကိစ္စတွေကို လေ့လာဦးမယ်လို့ ဆိုနေကြပါတယ်။

သမ္မတဟောင်း ဘုရ်ှလက်ထက်က အခွန်လျှော့ချမှုတွေက နှစ်ကူးတာနဲ့ ပျက်ပြယ်သွားပြီမို့ ကွန်ဂရက်က ဒီဥပဒေ အတည်ပြုမပေးရင် အမေရိကန် အလုပ်သမား လူတန်းစားအားလုံး အခွန်တွေတက်ပြီး သုံးအားတွေကျ၊ စီးပွားရေး ပြန်လည် တုံ့ဆိုင်းသွားနိုင်တဲ့အထိ ထိခိုက်နိုင်ပါတယ်။

လွှတ်တော်နှစ်ရပ်ပေါင်း အမေရိကန်ကွန်ဂရက်က လက်ခံမှာလား ဆိုတာကတော့ ဒီဥပဒေကို ပြင်ချင်တာတွေ ရှိတယ်၊ ဒီဥပဒေ လက်ခံမယ် ပြင်ဆင်မယ်ဆိုတာက အမတ်အားလုံး သုံးသပ်ချက် ပေးနိုင်ဖို့ လိုတယ် ကွန်ဂရက် ဥက္ကဋ္ဌ ဂျွန်ဘိုနာက တခြား ကွန်ဂရက် ခေါင်းဆောင်တွေနဲ့ ပူးတွဲ ကြေညာ ခဲ့ပါတယ်။

နှစ်သစ်မှာ သမ္မတဦးသိန်းစိန် ရေဒီယိုမိန့်ခွန်းစတင်

သမ္မတအိုဘားမားလို အပတ်စဉ်ပြောသွားမှာ မဟုတ်ဘဲ လိုအပ်တယ်လို့ ယူဆရင် ပြောသွားမယ်လို့ ဆိုသူ

သမ္မတဦးသိန်းစိန်က ခရစ်နှစ်ကူး ဒီကနေ့မှာ တိုင်းပြည်ကို ငါးမိနစ်သာကြာတဲ့ ရေဒီယိုမိန့်ခွန်းတရပ်ကို စတင်ပြောကြားရာမှာ ဆန္ဒထုတ်ဖော် တောင်းဆိုခွင့်တွေ ရှိပေမယ့်လို့ ဒီ လွပ်လပ်ပွင့်လင်းမှုကို ရင့်ကျက်စွာ တုန့်ပြန်ဖို့ သတိပေး ပြောကြားခဲ့ပါတယ်။

အစိုးရနဲ့လူထုကြား ဆက်သွယ်ရေးကောင်းဖို့ အခုလို ရေဒီယိုမိန့်ခွန်း ပြောတယ် ဆိုပေမယ့် အမေရိကန် သမ္မတတွေလို အပတ်စဉ် မိန့်ခွန်း ပြောသွားမှာတော့ မဟုတ်ဘဲ သမ္မတဦးသိန်းစိန်က လူထုကို ပြောဖို့ လိုအပ်လာတယ်လို့ ယူဆချိန်တွေမှာ ရေဒီယိုမိန့်ခွန်းတွေ ပြောသွားမှာ ဖြစ်တယ်လို့ သမ္မတရုံး ညွှန်ကြားရေးမှူး ဦးဇော်ဌေးက ဘီဘီစီကို ပြောပါတယ်။

ရေဒီယိုဟာ ဒီနေ့ခေတ် နည်းပညာ ထွန်းကားတဲ့ ကာလမှာ ထိရောက်တဲ့ ဆက်သွယ်ရေး လမ်းကြောင်း ဖြစ်နေသေးတယ်လို့ သမ္မတက မိန့်ခွန်းမှာ ထည့်ပြောခဲ့ပါတယ်။

သမ္မတဦးသိန်းစိန်က ပွင့်လင်း လွတ်လပ်မှုတွေ မရှိခဲ့ဘဲ အထီးကျန် ဆန်ခဲ့ရတဲ့ မြန်မာ့ လူ့အဖွဲ့အစည်းတွင်းမှာ ပြုပြင်၊ ပြောင်းလဲစရာတွေနဲ့ ပြည့်နှက် နေတာကို သိပါကြောင်းကိုလည်း ပြောပါတယ်။

ပြီးခဲ့တဲ့နှစ် ၂၀၁၂ အတွင်း မြန်မာ့နိုင်ငံရေး အပြောင်းအလဲတွေကိုလည်း သမ္မတဦးသိန်းစိန်က ကမ္ဘာကပင် အံ့သြစရာကောင်းတဲ့ နိုင်ငံရေး ဖြစ်ထွန်းမှုလို့ မြန်မာ့အပြောင်းအလဲကို သမ္မတ တဦးအနေနဲ့ ကိုယ်တိုင် ချီးကျူး ပြောကြားခဲ့ပါတယ်။

ဒါပေမဲ့ သမ္မတဦးသိန်းစိန်ရဲ့ ဒီကနေ့ ပြောကြားလိုက် ခရစ်နှစ်ကူး မိန့်ခွန်းမှာ ယေဘူကျ သဘော ပြောကြားချက်တွေသာ ပါဝင်ပြီး တိကျတဲ့ ကတိပြု ပြောကြားချက်တွေ မပါဝင်ဘူးလို့ သုံးသပ်သူတွေလည်း ရှိကြပါတယ်။

လတ်တလော ပြဿနာ တက်နေတဲ့ လက်ပံတောင်းတောင် ကြေးနီစီမံကိန်းလို ကိစ္စတွေ၊ ကချင်တပ်တွေနဲ့ တိုက်ခိုက်နေရတဲ့ ကိစ္စတွေ၊ အနည်းဆုံး ဘာကြောင့် အခုလို တိုက်နေရပါတယ် ဆိုတာမျိုး တိတိကျကျ ထုတ်မပြောသွားတဲ့အတွက် ယေဘူယျ ဆန်လွန်းတယ်လို့ ပြည်သူ့ခေတ် ဂျာနယ်ရဲ့ အယ်ဒီတာချုပ် ဦးမော်လင်းက သုံးသပ်ပါတယ်။

အာဆီယံ အတွင်းရေးမှူးချုပ် အသစ် ခန့်အပ်

အရှေ့တောင် အာရှနိုင်ငံများအသင်း အတွင်းရေးမှူးချုပ်သစ် ဗီယက်နမ်နိုင်ငံက Le Luong Minh

အရှေ့တောင် အာရှနိုင်ငံများအသင်း - အာဆီယံရဲ့ လက်ရှိအတွင်းရေးမှူးချုပ် Surin Pitsuwan နေရာမှာ ဗီယက်နမ်နိုင်ငံက Le Luong Minh က ဒီကနေ့ကစပြီး တရားဝင် တာဝန် လွဲပြောင်းရယူလိုက်ပြီ ဖြစ်ပါတယ်။

ထိုင်းနိုင်ငံသား Mr. Pitsuwan ထံက ဗီယက်နိုင်ငံသား Le Luong Minh က အခုလို အတွင်းရေးမှူးချုပ် ရာထူးကို လွဲပြောင်း ရယူမှာဖြစ်တဲ့အတွက် တောင်တရုတ်ပင်လယ်ပြင်အတွင်း အာဆီယံနိုင်ငံတွေနဲ့ တရုတ်နိုင်ငံတို့အကြား ရေပိုင်နယ်က ပိုင်ဆိုင်မှု အငြင်းပွားနေတဲ့ကိစ္စကို မီးမောင်းထိုးပြသလို ဖြစ်ကောင်း ဖြစ်လာနိုင်ပါတယ်။

ဒါပေမယ့်လည်း ဒီကိစ္စမှာ အာဆီယံအနေနဲ့ အရင်ကအတိုင်းပဲ သတိထားပြီး အများစုရဲ့ သဘောဆန္ဒကို ရယူပြီးမှ ကိုင်တွယ် ဖြေရှင်းသွားလိမ့်မယ်လို့ နိုင်ငံရေးအကဲခတ်တွေက သုံးသပ်နေကြပါတယ်။

ဗီယက်နမ်နိုင်ငံသားတဦးက အာဆီယံအတွင်းရေးမှူးချုပ်ရာထူးကို လွဲပြောင်း ရယူမယ့်အပေါ် ကွန်မြူနစ် တစ်ပါတီနိုင်ငံချင်း အတူတူဖြစ်တာကြောင့် တရုတ်တို့ကလည်း ထူးဆန်းစွာ လက်ခံ ကြိုဆိုနိုင်ပါတယ်။

ကွန်မြူနစ်တွေကို စုပေါင်း ဆန့်ကျင်ရေး ရည်ရွယ်ချက်နဲ့ အရှေ့တောင်အာရှနိုင်ငံများအသင်းကို ၁၉၆၇ ခုနှစ်မှာ ဖွဲ့စည်းခဲ့တာဖြစ်ပေမယ့် နောက်ပိုင်းမှာ နိုင်ငံရေးနဲ့ စီးပွားရေးဆိုင်ရာ ပူးပေါင်းဆောင်ရွက်ရေးအဖွဲ့အဖြစ် ဒေသတွင်းနိုင်ငံတွေနဲ့ တိုးချဲ့ ဖွဲ့စည်းခဲ့တာပါ။ အာဆီယံအဖွဲ့ကို စတင်တည်ထောင်တဲ့ အင်ဒိုနီးရှား၊ မလေးရှား၊ ဖိလစ်ပိုင်၊ စင်္ကာပူ၊ ထိုင်းနိုင်ငံတို့က အတွင်းရေးမှူးချုပ် ရာထူးကို ၂ ကြိမ်စီ တာဝန်ထမ်းဆောင်ပြီးဖြစ်ပါတယ်။ မြန်မာနဲ့ လာအိုနိုင်ငံတွေကတော့ အဲဒီ တာဝန်ကို ထမ်းဆောင်ခြင်း မရှိသေးပါဘူး။

အမေရိကန် ဘဏ္ဍာရေး ညှိနှိုင်းမှု အထက်လွှတ်တော် အတည်ပြု

အထက်လွှတ်တော် အမတ်အနည်းစုခေါင်းဆောင် Mitch McConnell

အမေရိကန်သမ္မတ အိမ်ဖြူတော်နဲ့ ရီပတ်ဘလီကန်ပါတီ လွှတ်တော်အမတ်တွေကြား ၂ ရက်ဆက်တိုက် အပြင်းအထန် ဆွေးနွေးညှိနှိုင်းပြီးနောက် Fiscal Cliff လို့ ခေါ်တဲ့ အခွန်တိုးမြင့် ကောက်ခံမှုတွေ သူ့အလိုလို ဖြစ်ပေါ်ပြီး အစိုးရအသုံးစားရိတ်တွေလည်း သိသိသာသာ ဖြတ်တောက်ပစ်မယ့် အရေးက ရှောင်ရှားနိုင်မယ့် အစီအစဉ်တရပ်ကို ဆီးနိတ် အထက်လွှတ်တော်က အတည်ပြုပေးလိုက်ပြီ ဖြစ်ပါတယ်။

အင်္ဂါနေ့ အစောပိုင်းမှာ ရရှိလိုက်တဲ့ အဲဒီ သဘောတူညီချက်ကို ၈၉ မဲ ၈ မဲနဲ့ အထက်လွှတ်တော်က အတည်ပြုလိုက်တာပါ။

အထက်လွှတ်တော်မှာ အဲဒီလို သဘောတူညီချက် ရလိုက်တဲ့အပေါ် သမ္မတ အိုဘားမားက ချီးကျူး ပြောကြားလိုက်ပြီး အောက်လွှတ်တော်ကလည်း အဆိုင်းမတွ အတည်ပြုပေးဖို့ တိုက်တွန်းလိုက်ပါတယ်။ ဒီသဘောတူညီချက် မူကြမ်းကို မဲခွဲ ဆုံးဖြတ်နိုင်ဖို့အတွက် ၀ါရှင်တန် စံတော်ချိန် နေ့လည် မွန်းတည့်ချိန်မှာ အောက်လွှတ်တော် စည်းဝေးပွဲ ခေါ်ထားပါတယ်။

ဒီသဘောတူညီချက်ဟာ ပြီးပြည့်စုံတဲ့ သဘောတူညီချက်မဟုတ်ပေမယ့်လည်း အမေရိကန်နိုင်ငံသား အများစုအပေါ် အခွန်တိုးကောက်မယ့် အစီအစဉ်က ရှောင်ရှားလိုက်နိုင်တယ်လို့ အထက်လွှတ်တော် အမတ်အနည်းစုခေါင်းဆောင် Mitch McConnell က ပြောပါတယ်။ ဒီသဘောတူညီရအောင် အထက်လွှတ်တော်ခေါင်းဆောင်တွေနဲ့ အတူ လက်တွဲလုပ်ဆောင်ခဲ့တဲ့ ဒုသမ္မတ Joe Biden ကိုလည်း Mitch McConnell က ကျေးဇူးတင်စကား ပြောကြားခဲ့ပါတယ်။

လကြောင်း တိုက်ခိုက်မှုကြောင့် ကချင်ဒုက္ခသည်အရေး စိုးရိမ်

ကချင်ပြည်နယ် လိုင်ဇာအနီးက ကချင်ဒုက္ခသည်စခန်းများ။

မြန်မာအစိုးရဘက်ကနေ ကချင်ပြည်နယ်အတွင်း လေကြောင်းကနေ တိုက်ခိုက်နေတာ ၆ရက်ဝန်းကျင် ရှိနေပါပြီ။ ဒါကြောင့် ကချင်ပြည်နယ်တွင်းက လိုင်ဇာမြို့ကပြည်သူတွေ၊ ဒုက္ခသည်တွေဟာ ကတုတ်ကျင်းတွေထဲ ခိုအောင်းနေထို်င်နေရပြီး ဒုက္ခသည်တချို့ ဟာလည်း လက်နက်များထိမှန်ပြီး သေဆုံးမှုတွေ ရှိနေပါတယ်။ ဒါဟာဆိုရင် အသက်ရှင်ရပ်တည်ခွင့်ဆိုတဲ့ မွေးရာပါ လူအခွင့်အရေးဆုံးရှုံးမှု တရပ်ဖြစ်တယ်လို့ ထိုင်းနယ်စပ် တရုတ်နယ်စပ်နဲ့ မြန်မာပြည်တွင်းက လူထုအခြေပြုလုပ်ငန်းတွေလုပ်နေတဲ့ အဖွဲ့ ၁၁ဖွဲ့က ပြောဆိုလိုက်ပါတယ်။ ဒီအကြောင်းအသေးစိတ်ကို ထိုင်းအခြေစိုက် ဗွီအိုအေသတင်းထောက် မအေးအေးမာက သတင်းပေးပို့ထားပါတယ်။

ကချင်ပြည်နယ်တွင်းမှာ ခရစ်ယာန်ဘာသာဝင်တွေရဲ ခရစ်စမတ် ကာလကစပြီး မြန်မာစစ်တပ်ဘက်က လေယာဉ်ကို အသုံးပြုပြီး တိုက်ခိုက်မူတွေ က၆ရက်ခန့်ရှိသွားပြီ ဖြစ်တာကြောင့် ကချင်ဒုက္ခသည် ဒေသခံတွေဟာ စိုးရိမ်ထိပ်လန့်မူတွေဖြစ်နေရကြောင်း လိုင်ဇာမြို့က ကချင်လူထု အခြေပြုအဖွဲ့အစည်းတွေရဲ့ ပြောရေးဆိုခွင့်ရှိသူ မမေရီတောင်းက ပြောဆိုလိုက်ပါတယ်။

“ခရစ်ယာန်ဘာသာကိုးကွယ်သူတွေ အထွတ်အမြတ်ထားတဲ့ နေ့ရက် ကာလဖြစ်ပါတယ်။ ဒီဇင်ဘာလ ၂၄ရက်နေ့ကစပြီး လေယာဉ်နဲ့ မြန်မာစစ်တပ်ဘက်က ဗုံးကျဲတိုက်ခိုက်တယ်။ အခုဆိုရင် လိုင်ဇာမှာ စစ်ပြေးဒုက္ခသည်စုစုပေါင်းဟာ တစ်သောင်းနဲ့ နှစ်ထောင်ကျော် ရှိတယ်။ ဒေသခံပြည်သူတွေနဲ့ ပေါင်းမယ်ဆိုရင် စုစုပေါင်း နှစ်သောင်းကျော် ရှိပါတယ်။ နေ့ခင်းမှာကို နှစ်ခါ သုံးခါ လာပစ်ပါတယ်။ ဒီနေ့ကို နေ့ခင်းတစ်နာရီကျော်အထိကို သုံးခါဆက်တိုက်ပစ်ပါတယ်။ နေ့တိုင်းပါပဲ။ ဒီနေ့ဆို စုစုပေါင်း ငါးရက်၊ ခြောက်ရက်ရှိနေပြီ။ ကျမတို့ဆီကို လေယာဉ်က သုံးခါလောက်ကို လာပြီးသွားပါပြီ။ နောက်ပြီး ဗုံးကျဲတယ်။ စစ်ပြေးဒုက္ခသည်တွေအပေါ်မှာ ရှိတဲ့အတွက်ကြောင့်မို့လို့ စစ်ပြေးဒုက္ခသည်အများစုဟာ ဆိုလို့ရှိရင် အရမ်းကြောက်လန့်နေကြတယ်။ ဆောက်တည်ရာမရဖြစ်ပြီး ငိုပြီးထွက်ပြေးနေကြတဲ့သူတွေလည်းရှိတယ်။ အခုဆိုရင် စစ်ပြေးဒုက္ခသည်စခန်းမှာ ကတုတ်ကျင်းတွေ တူးထားပြီးတော့မှ လေယာဉ်အပေါ်က ပစ်ပြီဆိုရင် ကလေးတွေရော အားလုံးဟာ ကတုတ်ကျင်းထဲ ပြေးဝင်နေရတဲ့အခြေအနေမှာဖြစ်နေရပါတယ်။”

ကချင်ပြည်နယ်တွင်းက ကေအိုင်အိုဌာနချုပ်လိုင်ဇာကို ဦးတည် ချီတက်နေပြီး လေကြောင်းကနေ အပြင်းအထန်ထိုးစစ်ဆင်မှုများကြောင့် ဒီဇင်ဘာလ (၂၇)ရက်နေ့တွင်ဝဲလ်ကြိုင်ဒုက္ခသည်စခန်းမှ ဦးမဂျီးတူး အသက်(၄၁)နှစ်ဟာ လက်နက်ကြီး ကျည်ဆံထိမှန်ကာ သေဆုံးသွားပြီး ဒုက္ခသည်စခန်းရှိ အခြား(၃)ဦးလည်း ပြင်းထန်စွာ ထိခိုက်ဒဏ်ရာရရှိသွားကြောင်း ကချင်လူထုအခြေပြု အဖွဲစည်း၁၁ဖွဲ့က ပြောဆိုပါတယ်။ လေယာဉ်နဲ့ တိုက်ခိုက်မှုတွေကြောင့် အပြစ်မဲ့တဲ့ကလေးသူငယ်၊ အမျိုးသမီးတွေနဲ့ ဒေသခံလူထုတွေ အပေါ် အချိန်မရွေး အန္တရာယ်ကျရောက်စေနိုင်တဲ့အတွက် ကချင်လူထုတွေဟာ အသက်ရှင်ရပ်တည်ခွင့် အခွင့်အရေးပါ ခြိမ်းခြောက်ခံနေရတယ်လို့ မမေရီတောင်းက ဆိုပါတယ်။

“ဝေဟင်ပေါ်ကနေ စစ်တိုက်လေယာဉ်နဲ့ကို ဗုံးကျဲတယ်ဆိုတာဟာ နိုင်ငံတကာရဲ့ စည်းမျဉ်းဥပဒေတွေအရ  ပြည်တွင်းစစ်မှာ စစ်လက်နက်ကို အသုံးမပြုသင့်ဘူး။ ဒေသခံအားလုံးကလည်း ကြောက်လန့်နေကြတယ်။ ပြောရမယ်ဆိုရင် ဒေသခံတွေအနေနဲ့ကလည်း ကြောက်လန့်စရာ ကောင်းတယ်။ လူတွေဟာ အခုဆိုရင် ထိတ်လန့်ခြောက်ခြားနေကြတယ်ပေါ့နော်။ ဒီလိုမျိုး ဗုံးကျဲနေတဲ့အခါ ကျတော့ အရမ်းကိုကြောက်ကြတယ်။ ဘယ်အချိ်န်လာမလဲပေါ့။ အခုဆိုရင် နေ့လည်းမအိပ်၊ ညလည်းမအိပ်၊တချိန်လုံး သူတို့မှာ နိုးနိုးကြားကြားနဲ့ ရှိနေရတယ်။ ဒါဟာ ဘယ်လိုမှ မလုပ်သင့်တဲ့ကိစ္စ၊ နိုင်ငံတကာက ပိတ်ပင်ထားတဲ့အရာကို ဒီလိုဗုံးကျဲတာပေါ့လေ။ အခုဆိုရင် နေ့တိုင်းကြားနေရတယ်။ နေ့တိုင်းလိုဖြစ်နေတဲ့ကိစ္စ၊ ဒေသခံတစ်ယောက်အနေနဲ့ရော၊ လူသားတစ်ယောက်အနေနဲ့ရော လူ့အသက်ရှင်ခွင့်ကို လူသားအသက်ရှင်ခွင့်ကို ခြိမ်းခြောက်နေတဲ့အခြေအနေကို ဖြစ်နေတယ်။”

ဒုက္ခသည်စခန်းလေးခုမှာလည်း ဒုက္ခသည် အရေအတွက် သောင်းနဲ့ချီရှိနေပြီး ဒုက္ခသည်တချို့ လည်း လက်နက်ကြီးတွေ ထိခိုက်ပြီး သေဆုံးမှုတွေရှိနေတာကြောင့် နယ်စပ်တလျောက် ကစင့်ကလျား ပြေးလွားပုန်းခိုနေရတဲ့ အခြေအနေတွေဖြစ်နေကြောင်း တရုတ် ပြည်ဘက်ကလည်း ဒုက္ခတွေကို လက်ခံခြင်း မရှိတဲ့အတွက် တရုတ်နယ်စပ်တလျောက်မှာ ဒုက္ခသည်တွေဟာ အခက်အခဲတွေဖြစ်နေရတယ်လို့ ဆိုပါတယ်။

ကချင်အမျိုးသမီးနဲ့ ကျောင်းသားတွေ လူထုအခြေပြုအဖွဲ့အစည်းတွေအားလုံး ၁၁ဖွဲ့ ပါဝင်တဲ့ သဘောထားကို ထုတ်ပြန်ရာမှာတော့ မြန်မာအစိုးရအနေနဲ့ ကေအိုင်အို၊ ကေအိုင်အေ၊ အပြစ်မဲ့ဒေသခံ ကချင်တိုင်းရင်းသားများ၊ နယ်စပ်တလျှောက်ရှိစစ်ပြေးဒုက္ခသည်စခန်းများကို အပေါ် ဂျက်တိုက်လေယာဉ်၊ စစ်ရဟတ်ယာဉ်များဖြင့် လေကြောင်းမှတိုက်ခိုက်နေခြင်းနှင့် လက်နက်ကြီးများဖြင့် ဦးတည် ပစ်ခတ်ခြင်းများကို ချက်ချင်းရပ်တန့်ဖို့  ကေအိုင်အို၊ ကေအိုင်အေ ဌာနချုပ်လိုင်ဇာကိုဦးတည်ပြီး ပြင်းပြင်းထန်ထန်ထိုးစစ်ဆင်နေမှုများ စစ်ရေးအရ ဖိအားပေး အကျပ်ကိုင်လာမှုများကို ချက်ချင်းရပ်တန့်ဖို့၊ နိုင်ငံတကာအစိုးရ၊ အိုင်အန်ဂျီအိုနှင့် အန်ဂျီအိုလိုခေါ်တဲ့ အစိုးရ မဟုတ်တဲ့အဖွဲ့တွေကှိ ဒုက္ခသည်များကို အကူအညီပေးမည့်ကိစ္စများကို မြန်မာအစိုးရမှ လွတ်လပ်စွာ လုပ်ကိုင်ဆောင်ရွက်ခွင့်နှင့် သွားလာခွင့်ပြုဖို့၊ လက်ရှိစစ်ပွဲဖြစ်ပွားနေသောဒေသရှိ စစ်တပ်များကို မိခင်တပ်ရင်းတပ်မသို့ ရွေ့ ပြောင်းသွားစေပြီး တပြည်လုံး အတိုင်းအတာဆောင်သော နိုင်ငံရေးတွေ့ဆုံ ဆွေးနွေးပွဲများကို အမြန်ဆုံး အကောင်အထည်ဖော် ဆောင်ရွက်ဖို့ဆိုတာတွေကို ကချင်အဖွဲအစည်း ၁၁ဖွဲ့ကနေ တောင်းဆိုထားပါတယ်။

ဟောင်ကောင်အကြီးအကဲ ရာထူးကထွက်ဖို့ တောင်းဆိုဆန္ဒပြ

တရုတ်အစိုးရရဲ့ ကျောထောက်နောက်ခံနဲ့ ဟောင်ကောင်ကျွန်းကို အုပ်ချုပ်နေပြီး နာမည်ပျက် သတင်းတွေ ထွက်နေတဲ့ အမှုဆောင် အရာရှိချုပ် ရာထူးက ဆင်းပေးပြီး၊ ကိုယ်ပိုင် ခေါင်းဆောင်တွေကို ရွေးချယ် တင်မြှောက် ခွင့်ရရေး တောင်းဆိုပြီး ဟောင်ကောင် ဒေသခံ ထောင်ပေါင်းများစွာ ဆန္ဒပြခဲ့ကြပါတယ်။ ဟောင်ကောင်ကျွန်းရဲ့ အကြီးအကဲ Leung Chun-ying ရာထူးက ဆင်းပေးဖို့ တောင်းဆိုတဲ့ ကြွေးကြော်သံတွေ ဆိုင်းဘုတ်တွေကို ကိုင်ဆောင်ပြီး နှစ်ဆန်းတစ်ရက်နေ့မှာ ချီတက် ဆန္ဒပြသူပေါင်းဟာ ၁၇,၀၀၀ လောက် ရှိတယ်လို့လည်း ရဲတွေက ပြောပါတယ်။

ပြီးခဲ့တဲ့ ဇူလိုင်လကစလို့ တာဝန်ယူ အုပ်ချုပ်နေတဲ့ Leung Chun-ying ဟာဆိုရင် မြေနေရာ ရှားပါးတဲ့အတွက် ကျပ်ကျပ်သပ်သပ် နေထိုင်နေကြရတဲ့ ဟောင်ကောင်မှာ သူ့ကိုယ်ပိုင် ဇိမ်ခံအိမ်ခန်းတွေကို တရားမ၀င် ဆောက်လုပ်ခဲ့တဲ့ကိစ္စ လူသိရှင်ကြား ဖြစ်ခဲ့ရချိန်ကစလို့ ဆန့်ကျင်ဝေဖန်မှုတွေ ခံနေရတာပါ။

ဒီဇင်ဘာလ ထဲမှာတုန်းကလည်း Leung Chun-ying အပေါ် အယုံအကြည်မရှိ အဆိုတရပ် တင်သွင်းခဲ့ပေမဲ့ တရုတ်အစိုးရ လိုလားသူ ဥပဒေပြု အမတ်တွေ ရဲ့ ထောက်ခံမှုနဲ့ ကျော်လွှားနိုင်ခဲ့တာ ဖြစ်ပါတယ်။ ဗြိတိန်နိုင်ငံကနေ ၁၉၉၇ ခုနှစ်မှာ တရုတ်နိုင်ငံက ပြန်လည် လွှဲပြောင်းရယူခဲ့တဲ့ ဟောင်ကောင်မှာ အုပ်ချုပ်မယ့်သူတွေကိုတော့ လတ်တလော တရုတ်အစိုးရကသာ ရွေးချယ် ခန့်ထားနေတာဖြစ်ပြီး ဟောင်ကောင်ကျွန်းသားတွေ ကိုယ်တိုင် ရွေးချယ်ခွင့်ကိုတော့ ၂၀၁၇ ခုနှစ်ကျမှ ရရှိနိုင်ကြမှာ ဖြစ်ပါတယ်။

 

 

လူဗိုလ်