တာဝန်မှ ပြန်လည်ရုပ်သိမ်းလို့ ရပြီလား

ပြည်ထောင်စုလွှတ်တော် မြင်ကွင်း

ရန်ကုန်တိုင်းဒေသကြီး အတွင်းရှိ ပြည်သူ့လွှတ်တော် ကိုယ်စားလှယ် တစ်ဦးကို လွှတ်တော် ကိုယ်စားလှယ်  အဖြစ်မှ ပြန်လည် ရုပ်သိမ်းပေးရန် မြို့ခံပြည်သူလူထုက ၂ဝ၁၂ ခုနှစ်၊ ဒီဇင်ဘာလတွင် ဆန္ဒထုတ်ဖော်ခဲ့ ကြောင်းနှင့် လွန်ခဲ့သည့် ဩဂုတ်လ ကလည်း မဲဆန္ဒရှင်ပြည်သူများကို စော်ကားသည်ဟုဆိုကာ ပြည်သူ့ လွှတ်တော် ကိုယ်စားလှယ် တစ်ဦးကို တာဝန်မှ ပြန်လည်ရုပ်သိမ်းနိုင်ရေး အတွက် မဲဆန္ဒရှင်တို့၏ လက်မှတ် များကို လိုက်လံစုဆောင်းနေကြောင်း၊  အပတ်စဉ်ထုတ် ဂျာနယ် စာမျက်နှာများတွင် ဖတ်ရသောအခါ တာဝန်မှ ပြန်လည် ရုပ်သိမ်းလို့ ရပြီလားဟူ၍ မေးရန် ရှိလာပါသည်။

တာဝန်မှ ပြန်လည်ရုပ်သိမ်းခွင့် ရှိ မရှိကို ဆိုလိုခြင်း မဟုတ်ပါ။ တာဝန်မှ ပြန်လည်ရုပ်သိမ်းခွင့် ရှိပါသည်။ ၂ဝဝ၈ ခုနှစ် ဖွဲ့စည်းပုံ အခြေခံ ဥပဒေတွင် ယင်းဥပဒေအရ ခန့်အပ် တာဝန်ပေးသော မည်သည့် အဖွဲ့အစည်းဝင် ပုဂ္ဂိုလ် တစ်ဦးတစ်ယောက် ကိုမဆို ဥပဒေပြဋ္ဌာန်းချက်ပါ အတိုင်း  (impeachment) စွပ်စွဲပြစ်တင်ခြင်းပြုသည့် နည်းလမ်းဖြင့် တာဝန်မှ ရပ်စဲနိုင်ခွင့် ရှိပါသည်။ ထိုသို့ စွပ်စွဲပြစ်တင်သော ဖြစ်စဉ်တစ်ရပ် ပေါ်ပေါက် ခဲ့သည် ကိုလည်း အများ သိပြီး ဖြစ်ပါသည်။

ပြည်သူတို့က ရွေးကောက် တင်မြှောက်ခဲ့သော လွှတ်တော်တစ်ရပ်၏ ကိုယ်စားလှယ် (လွှတ်တော်အမတ်) ကိုလည်း မဲဆန္ဒရှင် ပြည်သူတို့က လွှတ်တော် ကိုယ်စားလှယ်၏ တာဝန်မှ ပြန်လည် ရုပ်သိမ်းခွင့်ရှိကြောင်း ဖွဲ့စည်းပုံ အခြေခံ ဥပဒေတွင် ပြဋ္ဌာန်းခဲ့ပါသည်။ သို့ရာတွင် ထိုသို့ လွှတ်တော်ကိုယ်စားလှယ်၏ တာဝန်မှ ပြန်လည် ရုပ်သိမ်းလို့ ရပါပြီလား။

လွှတ်တော် ကိုယ်စားလှယ် တာဝန်မှ ပြန်လည် ရုပ်သိမ်းခြင်းနှင့် စပ်လျဉ်း၍ ဖွဲ့စည်းပုံ အခြေခံ ဥပဒေပုဒ်မ ၃၉၆ တွင် အောက်ပါ အတိုင်း ပြဋ္ဌာန်းထားသည် ကို တွေ့ရပါသည်။

(က) လွှတ်တော် ကိုယ်စားလှယ်တစ်ဦးကို အောက်ပါအကြောင်းတစ်ရပ်ရပ်ကြောင့်  တာဝန်မှ ပြန်လည် ရုပ်သိမ်းခွင့်ရှိသည်။

(၁) နိုင်ငံတော်၏ ကျေးဇူး သစ္စာကို ဖောက်ဖျက်ခြင်း၊

(၂) ဤ ဖွဲ့စည်းပုံ အခြေခံဥပဒေပါ ပြဋ္ဌာန်းချက် တစ်ရပ်ရပ်ကို ဖောက်ဖျက် ကျူးလွန်ခြင်း၊

(၃) အကျင့်သိက္ခာ ပျက်ပြား ခြင်း၊

(၄) ဤဖွဲ့စည်းပုံ အခြေခံ ဥပဒေတွင် သတ်မှတ်ထားသည့် သက်ဆိုင်ရာ လွှတ်တော် ကိုယ်စားလှယ်၏ အရည်အချင်း ပျက်ယွင်းခြင်း၊

(၅) ဥပဒေအရ ပေးအပ်ထားသော တာဝန်များကို ကျေပွန်စွာ မဆောင်ရွက်ခြင်း၊

ဤအပိုဒ်ခွဲ (က)ပါအချက် များအနက် နံပါတ် (၄)မှ အပ ကျန်အချက်များသည် ပြည်ထောင်စုအစိုးရ အဖွဲ့ အကြီးအကဲမှစ၍ ဒုတိယဝန်ကြီး(အဆင့်)ထိအား စွပ်စွဲပြစ်တင်နိုင်သည့် အချက်များနှင့် ယေဘုယျ အားဖြင့် တူညီပါသည်။ သို့သော် တာဝန်မှ ပြန်လည် ရုပ်သိမ်းနိုင်သည့်  နည်းလမ်းများမှာမူ ရုပ်သိမ်းရန်  ပို၍ပင် ခက်ခဲသည်ဟု ဆိုရပါမည်။

လွှတ်တော် ကိုယ်စားလှယ်၏ တာဝန်မှ ပြန်လည်ရုပ်သိမ်းရန် နည်းလမ်း(တစ်စိတ်တစ်ဒေသ)ကို ထို ပုဒ်မ အပိုဒ်ခွဲ(ခ)မှ (င)အထိ ဖော်ပြထားရာ အတိုချုပ် ပြောရလျှင် မူလမဲဆန္ဒရှင်၏ ၁ ရာခိုင်နှုန်းက တိုင်တန်းချက်ကို ရွေးကောက် ပွဲ ကော်မရှင်သို့ တင်ပြရခြင်း၊ ထိုကော်မရှင် က ဥပဒေနှင့်အညီ စုံစမ်းစစ်ဆေးရခြင်း၊ လွှတ်တော် ကိုယ်စားလှယ်အား ခုခံချေပခွင့်ပေးခြင်း ပြုပြီးနောက် စွပ်စွဲချက်မှန်ကန်သည့်အပြင် လွှတ်တော်ကိုယ်စားလှယ် အဖြစ် ဆက်လက် ထမ်းရွက်ရန် မသင့်ကြောင်း သဘော ရရှိလျှင် ပြည်ထောင်စု ရွေးကောက်ပွဲ ကော်မရှင်က ဥပဒေနှင့် အညီ ဆက်လက် ဆောင်ရွက် ရမည်ဟု ဖော်ပြထားကြောင်း တွေ့ရပါသည်။ ဥပဒေနှင့် အညီ ဆောင်ရွက်ရမည် ဆိုသည်မှာ အဘယ်ပါနည်း။

ဖွဲ့စည်းပုံ အခြေခံဥပဒေပုဒ်မ ၃၉၇ တွင် ပြည်ထောင်စု လွှတ်တော်သည် ရွေးကောက်တင်မြှောက်ခြင်း ဆိုင်ရာ ကိစ္စများနှင့် စပ်လျဉ်း၍လည်း ကောင်း၊ တာဝန်မှ ပြန်လည် ရုပ်သိမ်းခြင်းဆိုင်ရာ ကိစ္စများနှင့် စပ်လျဉ်း၍ လည်းကောင်း၊ လိုအပ်သော ဥပဒေများကို ပြဋ္ဌာန်းရမည်ဟူ၍ ပြဋ္ဌာန်းထားရာ ထိုသို့ လိုအပ်သော ဥပဒေကို သီးခြား ပြဋ္ဌာန်းရခြင်း မရှိသေးပါက မည်သည့် လွှတ်တော် ကိုယ်စားလှယ်ကိုမှ သူ၏ မဲဆန္ဒရှင်တို့က တာဝန်မှ ပြန်လည် ရုပ်သိမ်းရန် နည်းလမ်း မရှိ ဟု ဆိုရပါမည်။

၂ဝ၁၂ ခုနှစ်၊ မတ်လတွင် ဂျာနယ်တစ်စောင်က ကောက်ယူခဲ့သည့်  စစ်တမ်းအရ ဒီမိုကရေစီ အပြောင်းအလဲ တစ်နှစ်ကာလ အတွင်း ပြည်သူများ၏ ယုံကြည်မှု အရှိဆုံးနှင့် ပြုပြင် ပြောင်းလဲမှု အမြန်ဆန်ဆုံးသည် ဥပဒေပြုရေး မဏ္ဍိုင်ဖြစ်ခဲ့သည်ဟု ဆိုပါသည်။

စတုတ္ထအကြိမ် လွှတ်တော် အစည်းအဝေးများ ပြီးမြောက်စဉ်က မေးခွန်းပေါင်း ၁၉၆၄ ခု မေးမြန်းခဲ့ပြီးသော် လည်း ပြည်ထောင်စု လွှတ်တော်က ဥပဒေ ၃၂ ခုသာလျှင် အတည်ပြု ပြဋ္ဌာန်းနိုင်သေးသည်ဟု ဆိုလေရာ လွှတ်တော် ကိုယ်စားလှယ်တို့သည် ဥပဒေပြုရန် အဓိက တာဝန်ထက် မဏ္ဍိုင်အချင်းချင်း ထိန်းကျောင်းရန် ကိစ္စကို ပို၍ အားသန်လေ သလော ဟု စောကြောဖွယ် ဖြစ်ပါသည်။ စင်စစ် တစ်စုံတစ်ရာသိလို၍ မေးခွန်း ထုတ်ဖို့ ဆိုသည်မှာ ဥပဒေတစ်ခု ပြုလုပ်ပြ ဋ္ဌာန်းရန်ထက် အဆများစွာ ပို၍ လွယ်ကူပါလိမ့်မည်။ ဥပဒေ ပြုရန် ဆိုသည်မှာ စေတနာသာမက ပညာဥာဏ် အမြော်အမြင်ပါ ပေါင်းစပ်ပြုလုပ်ရသော အမွန်အမြတ်ကိစ္စ တစ်ခု ဖြစ်လေရာ လွှတ်တော် အဆင့်ဆင့်၏ သက်တမ်း ၁ နှစ်နှင့် ၉ လ  ကျော်လွန်ခဲ့ပြီး ပဉ္စမမြောက် အစည်း အဝေးများ ပြီးဆုံးခဲ့သည့်တိုင် တာဝန်မှ ပြန်လည် ရုပ်သိမ်းသည့် ဥပဒေတစ်ခု မပြဋ္ဌာန်းနိုင်သေးသည့် အချက်က သက်သေခံလျက် ရှိပါသည်။

သို့သော် လွှတ်တော် ကိုယ်စားလှယ်တာဝန်မှ ပြန်လည်ရုပ်သိမ်း ခြင်းဆိုင်ရာ ဥပဒေကြမ်း ကို ပြည်သူတို့ သိရှိလေ့လာ အကြံပြုနိုင်ရန် အတွက် ဟုဆိုကာ ၃ဝ.၈.၂ဝ၁၂ ရက်နေ့ထုတ် နိုင်ငံပိုင်သတင်းစာ တွင် ပုံနှိပ်ဖော်ပြခဲ့ပါသည်။

တာဝန်မှ ပြန်လည်ရုပ်သိမ်း ခြင်းနှင့်စပ်လျဉ်း၍ မည်သို့ဆောင် ရွက်ရမည်ကို ပုဒ်မ ၇ မှ ၁၆ အထိ ရေးသား ဖော်ပြ ထားကြောင်း တွေ့ရပါသည်။

အတိုချုပ်ပါမည်။ မူလ မဲဆန္ဒရှင်များအနက် ၁ ရာခိုင်နှုန်း၏ တိုင် တန်းချက်ကို ရရှိသော ပြည်ထောင် စု ရွေးကောက်ပွဲ ကော်မရှင် သည် ကော်မရှင်အဖွဲ့ဝင် ၃ ဦးပါဝင်သော စုံစမ်းစစ်ဆေးရေးအဖွဲ့ကို ဖွဲ့စည်း ရမည်။ ၁ ရာခိုင်နှုန်းက တိုင်တန်း ခြင်း ဟုတ်မဟုတ် စစ်ဆေးရမည်။ မှန်ကန်ပါက ပုဒ်မ ၇ ပါအချက်များ နှင့် ငြိစွန်းခြင်း ရှိ မရှိ စစ်ဆေးရမည်။ (ပုဒ်မ ၇ သည် အခြေခံဥပဒေပုဒ်မ ၃၉၆ (က)ပါအတိုင်းဖြစ်သည်)။ ထိုတစ်ချက်ချက်နှင့် ငြိစွန်းပါက ပြည်ထောင်စု ရွေးကောက်ပွဲကော်မရှင် သို့ တင်ပြရမည်။ စွပ်စွဲချက် မှန်ကန်ကြောင်း တွေ့ရှိရမည်။ စွပ်စွဲခံရသူ သည် လွှတ်တော် ကိုယ်စားလှယ်အဖြစ် ဆက်လက် ထမ်းရွက်ရန် မသင့်  ကြောင်း ကော်မရှင် အဖွဲ့ဝင်အားလုံး က သဘောရရှိရမည်။(မရုပ်သိမ်း နိုင်သေးပါ)။

ထိုသို့သဘောရရှိသည် ဆိုပါက ယင်းလွှတ်တော် ကိုယ်စားလှယ်ကို တာဝန်မှ ပြန်လည်ရုပ်သိမ်းရန်အလို့ငှာ သက်ဆိုင်ရာ ဆန္ဒနယ်၏ မူလမဲစာရင်းပါ (အသစ်ထပ် မထည့်ရ) မဲဆန္ဒရှင်တို့က ဆန္ဒမဲ ပေးရမည်။ တာဝန်မှ ပြန်လည် ရုပ်သိမ်းကြောင်း သို့မဟုတ် မရုပ်သိမ်းကြောင်းကို မဲဆန္ဒရှင် ထက်ဝက်ကျော်  ဆန္ဒမဲဖြင့်သာ အတည်ပြု ဆုံးဖြတ်နိုင်သည်။

ဥပဒေကြမ်းမျှသာ ဖြစ်၍ ပြည်ထောင်စု လွှတ်တော်က အတည်မပြုသေးမီ ဝေဖန်အကြံပြုရန် အချက်များ ရှိပါ လိမ့်မည်။ ဥပမာ ယင်းဥပဒေကြမ်း၏ အလိုအရ ပုဒ်မ ၇ ပါ အချက်များဖြစ်သည့် နိုင်ငံတော်၏ ကျေးဇူးသစ္စာကို ဖောက်ဖျက်ခြင်း၊ အကျင့်သိက္ခာပျက်ပြားခြင်း၊ တာဝန် မကျေပွန်ခြင်း စသည်တို့ပြုလုပ်ခဲ့ကြောင်း စစ်ဆေး ပေါ်ပေါက်စေကာမူ တာဝန်မှ ပြန် လည် ရုပ်သိမ်းခြင်း မပြုလိုကြောင်း မဲဆန္ဒရှင် ထက်ဝက်ကျော်က ဆန္ဒမဲ ပေးလျှင် လွှတ်တော် ကိုယ်စားလှယ် အဖြစ် ဆက်၍ ရပ်တည်ခွင့် ရှိသည့် သဘော သက်ရောက်ပါသည်။

ပြန်၍ ဆင်ခြင်သုံးသပ်ရန် အချက်များ ရှိဦးမည် ဖြစ်သော်လည်း လွှတ်တော်ကိုယ်စားလှယ်အဖြစ် တစ်ကြိမ် တစ်ခါ ရွေးကောက်တင် မြှောက်ထားခဲ့ပြီးဖြစ်ပါက ယင်းထံမှ တိုက်ပုံနှင့်ေ ခါင်းပေါင်းကို ပြန်ချွတ်ရန် အလွန်တရာ ခက်ခဲလိမ့်မည်ကို သတိပြုစေလိုခြင်း ဖြစ်ပါသည်။

လွှတ်တော်ကိုယ်စားလှယ်တစ် ဦးအား တာဝန်မှ ပြန်လည်ရုပ်သိမ်း ရန်အတွက် ဥပဒေပြဋ္ဌာန်းချက် တစ်စုံတစ်ရာ ယခု အချိန် အထိ မရှိသေးသည်ကိုလည်းကောင်း၊ ယင်းဥပဒေ မပြဋ္ဌာန်းနိုင်သေးသမျှ တာဝန်မှ ပြန်လည် ရုပ်သိမ်း၍ မရနိုင်သေးသည် ကိုလည်းကောင်း သတိပြုစေလို ခြင်းဖြစ်ပါသည်။

ကျွန်တော်တို့သည် ပစ္စုပ္ပန်ကို လွယ်လွယ်ဖြတ်သန်းလေ့ ရှိပါသည်။ ပစ္စုပ္ပန်သည် အနာဂတ်ကို မွေးဖွား ပေးကြောင်း အလေး အနက် ဆင်ခြင်ရန် မေ့မေ့လျော့လျော့ ရှိတတ်ပါသည်။ နှစ်ကာလများအတွင်း ဆန္ဒမဲပေးသည့် အတွေ့အကြုံ မရှိခဲ့ခြင်းကြောင့်လည်း ဖြစ်နိုင်ပါသည်။ ဘီလူး၊ နဂါး ကွဲပြားအောင် ဆင်ခြင်လျက် အသည်းကြားက မဲတစ်ပြားကို တန်ဖိုးထား၍ အသုံးချနိုင်ဖို့သာ လိုရင်း အချက်ဖြစ်မည် ထင်ပါသည်။

ဇေယျာမိုးမြင့်စံ